മഴമണിച്ചിലങ്കയില്‍ മനസ്സലിയുബോള്‍
മണിമുറ്റമോര്‍മ്മയില്‍ കളിവള്ളമോട്ടുന്നു...!
ഇടതുകാല്‍പ്പാദത്തിനടിയിലായ് കുളിരിട്ട്
അലസമായൊഴുകുന്നു അരുമയാം ചിരിയുമായ്
മധുമണം വിരിയിച്ചൊരാദ്യ പ്രവാഹത്തില്‍
പ്രകൃതിതന്‍ സൗന്ദര്യം ഉന്മാദ ഗന്ധമായ്
മലരിതള്‍ പൊഴിയിച്ചാ ഉടലില്‍ ശയിപ്പിച്ച്
അരുവിയായ് ഒഴുകുന്നു നാനാദിശയിലും.
തളിരിലക്കൈകളില്‍ തെന്നിത്തെറിച്ചെത്തി
പലകുറി പൈതലായ് നീന്തിത്തുടിക്കുന്നു
ഇനിയെനിക്കാകീല
കൊതിവന്നു നിറയുന്നു,
മണിമുറ്റമോടിയാ
മഴയില്‍ കളിക്കുവാന്‍
നറുകുടത്തുള്ളിയെ ശിരസ്സില്‍ ധരിക്കുവാന്‍
അതിനുള്ളിലൊളിയിച്ച കുളിരില്‍ വിറക്കുവാന്‍
മനസ്സൊരു കുഞ്ഞായി മഴയിലേക്കോടുബോള്‍
അറിയാതെ നനയുന്നു മിഴികള്‍ നിറയുന്നു
ഒരുമാത്ര വന്നെങ്കിലോര്‍മ്മയായല്ലാതെ
ഒരു കുഞ്ഞു പാദമായ് ബാല്യമേ എന്‍മുന്നില്‍.
..........അഭിലാഷ്..........
No comments:
Post a Comment