എൻെറ ഗ്രാമം

ഗ്രാമ ദേവതയുടെ മാറിലൂടെ ശാന്തമായ് ഒഴുകുന്ന പുഴയുടെ കൈവഴി. കൽപ്പ വൃക്ഷങ്ങൾ ഇടതൂർന്ന മണൽ തിട്ടയുടെ പാവാട ഞൊറികളിൽ വേലിയേറ്റത്തിൻ കൈകൾ നീർപ്പോളയും പായലും ചന്തമായ് തുന്നി പിടിപ്പിച്ചിരിക്കുന്നു. രാക്കോഴിയുടെ കൂവലിന് ഗ്രാമം കാതോർക്കുന്നുണ്ട്. പൂർണ്ണ ചന്ദ്രക്കല വെള്ള വിരിച്ച വയൽ വരബുകൾ കീറിമുറിച്ച്, ആഞ്ഞിലി തലപ്പുകളിൽ  കൊറ്റികൾ ചേക്കേറുന്ന ഹൃദയ സ്പർശിയായ കാഴ്ച ഗ്രാമ ദേവതയുടെ അനുഗ്രഹമാണ്. മായുന്ന സൂര്യൻ പൊഴിച്ചിട്ട ചെമപ്പിൻെറ ചേല ചുറ്റി രാവിനെ വരവേല്ക്കുന്ന  ചക്രവാളം ഒരു അപ്സരസ്സിനെ പോൽ സുന്ദരിയാണ്. ചേറുമണമുള്ള വയൽ വരബിലെ കാറ്റിൽ ചിങ്ങത്തിൽ നട്ട വിത്തിനെ ചൊല്ലിയുള്ള പ്രതീക്ഷകളും, വിളവെടുപ്പിനുള്ള കാത്തിരിപ്പിൻെറയും പോയ് മറഞ്ഞതും വന്നണയാനുള്ളതുമായ സുന്ദര സ്വപ്നങ്ങളുടെ കഥകളും തെന്നിപ്പറക്കുന്നുണ്ട്. തണ്ടൊടിഞ്ഞ നെൽമണികൾ പെറുക്കി പറക്കുന്ന പറവകൾ സായാഹ്നത്തിൻെറ സൗന്ദര്യ ഭാവമാണ്. ഗ്രാമദേവതക്ക് ചാർത്താൻ താമരവള്ളികൾ തണ്ടിൽ പ്രാർത്ഥന നെയ്ത്, ശുദ്ധരിൽ ശുദ്ധയായ് ജലത്തിൽ ശയിക്കുന്നുമുണ്ട്. ദേവതയുടെ മാറിൽ വീണ് മഴമണികൾ ഉടയാറില്ലിവിടെ... വൃക്ഷത്തലപ്പുകൾ തളിരിലകളാൽ ലാളിച്ച്, പൂവിതൾ മണം നൽകി, തലോടി ഉറക്കി മണ്ണിലേക്ക് അവനെ വരവേൽക്കുകയാണ് അവനെ.  ഇവിടെയെന്നും വസന്തമാണ്. ഇഷ്ട വസന്തങ്ങളുടെ തോരാമഴ...!  ആ മഴ നനയാൻ ഇവിടത്തെ പുൽ നാബുകളിൽ വീണുറങ്ങാൻ ജന്മങ്ങൾ ഇനിയും ലഭിക്കട്ടെ. എൻെറ ഗ്രാമം ഇങ്ങനെ നില നിൽക്കട്ടെ...!!!

ശുഭദിനം

........അഭിലാഷ് ......