ഒരുമ്മകൊണ്ടെന്നത്തടഞ്ഞവള്‍
ഒരുനോക്കിനാല്‍ എന്നെത്തളച്ചവള്‍
ഒരുവാക്കിനാല്‍ ഹൃദയം തകര്‍ത്തതില്‍
ഒരുവേനലായ് ഓര്‍മ്മയും തന്നവള്‍
ഒരുയുഗം ഞാനെരിഞ്ഞടങ്ങാന്‍
ഒരു സ്വരം അവള്‍ മൂളി കാതില്‍
ഒരിടത്തുനില്‍ക്കാത്ത ചിന്തകള്‍
മനസ്സിനുള്ളിലെവൃണങ്ങളായ് തന്നവള്‍
ഒരു ചിരികൊണ്ടു കണ്ണുകെട്ടിയെന്‍
ഒരു യുഗത്തിന്‍റെ സ്നേഹവും മാച്ചവള്‍
ഒരു മഴക്കാറ്റു പോലെയെത്തി
എടുത്തുലച്ചവള്‍ പറന്നുപോയ്...
ഒരുമൊഴികൊണ്ടു ധാരനാട്ടി
ഇരുമിഴികളില്‍ പകര്‍ന്നുനല്‍കി
ചിരികരയുന്ന രൂപമാക്കി
ചൊടിനനയുന്ന ഓര്‍മ്മയായി
ഒരുവസന്തമായ് എത്തിനോക്കി
ഒരു ശിശിരമായ് മനസ്സുമാറ്റി
ജലമുറഞ്ഞോരു നെഞ്ചിലേക്ക്
നിണമുരുകുന്ന ഓര്‍മ്മ നല്‍കി
ഒരു കാപട്യ മേനി നീയോ
ഒരു കാടന്‍റെ രൂപമോ ഞാന്‍
അതറിയാതെ പോയിഞാനും
അതറിയാനായ് വാണിടുന്നു...
ഇനിയൊരല്പം ബാക്കിയുണ്ട്
പ്രണയമെന്നില്‍ ബാക്കിയുണ്ട്
അതുമെടുത്തു നീ കൊണ്ടുപോക
അതിലുമുണ്ടെന്‍റെ ജീവഗന്ധം
വിധിയെടുത്തൊരാ നിത്യ ചിത്രം
മനസ്സുടച്ചൊരാ ചില്ലു ചിത്രം
വികൃതമായൊന്നു ചേര്‍ത്തുവച്ച്
അതിനു കാവല്‍ നില്‍ക്കയാണ്
ഇനിയുമെന്നില്‍ പ്രണയമുണ്ട്
അതുമെടുക്കെന്‍റെ കപടരൂപേ
അതുനിനക്കായ് മാത്രമാണ്
അതുതരുബോള്‍ ഇഷ്ടമാണ്
.........അഭിലാഷ്........
No comments:
Post a Comment