ഇനിയെത്രനാളിനിയെത്രനാളെന്‍റ
ഇരുള്‍വീണ മനസ്സിലൊന്നണയ നീ പ്രണയമേ...
ഒരു നോക്കുകാണുവാന്‍ ഒരുവാക്കുമിണ്ടിടാന്‍
ഒരു കുഞ്ഞു കാഴ്ചയെന്‍ കണ്ണില്‍ പടര്‍ത്തുവാന്‍
ഇനിയെത്രനാളിനിയെത്രനാളെന്‍റെ
ഹൃദയത്തിലെത്തി നീ ചിത്രം വരച്ചിടാന്‍
പകലെന്നതറിയില്ല പൂക്കളില്‍ നിറമില്ല
നീയില്ലാ കാറ്റിന്‍റെ മാറിലും മണമില്ല
കൊഴിയുന്നതിന്‍ മുന്‍പ് പൂവിന്‍റെ കാതിലാ-
മധുരമാം പാട്ടുമായ് വണ്ടിന്‍റെ കൂട്ടില്ല
ഇനിയെത്രനാളിനിയെത്രനാളെന്‍റെ
കരളിലേ ശോകങ്ങള്‍ നീയൊന്നു നീക്കിടാന്‍
മോഹങ്ങള്‍ പങ്കിടാന്‍ ചേര്‍ത്തൊന്നു പുല്‍കിടാന്‍
രാവിന്‍റെ മാറിലെന്‍ മടിയില്‍ മയങ്ങിടാന്‍
എരിയുന്ന റാന്തല്‍ വിളക്കിന്നു കീഴിലായ്
കഥകള്‍ പറഞ്ഞൊരാ കവിളില്‍ കളമിടാന്‍
ഇനിയെത്രനാളിനിയെത്രനാളന്‍റെ
പ്രണയമേ നീയെന്‍റെ സിരയില്‍ പടരുവാന്‍
വാര്‍ദ്ധക്യമെത്തുന്ന നാളിന്നു മുന്‍പിലായ്
ഒരു നിമിഷമെങ്കിലും കൂട്ടൊന്നിരിക്കണേ
ഒരു മാത്രമതിയെന്‍റെ ഒരു മാത്ര പ്രണയമേ
അതിനുള്ളിലേകിടാമവിരാമ പ്രണയവും
അതിനായ് ഞാന്‍കൊണ്ടയുഗങ്ങളാം തപമതും.
ഇനിയെത്രനാളിനിയെത്രനാളെന്‍റെ
മനസ്സിന്‍റെയാരാമ മൊട്ടായ്‌ വിരിഞ്ഞിടാന്‍
അതിനിതള്‍പൊഴിയാതെ അതിന്‍ മണം മായാതെ
കൂട്ടൊന്നിരിക്കാന്‍ കനവുകള്‍ കണ്ടിടാന്‍
പ്രണയമേ നീയെന്‍റെ ജീവനില്‍ ചേരുകില്‍
ജീവിതമെന്നതൊരു പൂമൊട്ടുപോലവേ
ഇനിയെത്രനാളിനിയെത്രനാളെന്‍റെ
അനുരാഗ സ്വപ്നമേ പൂത്തൊന്നുലഞ്ഞിടാന്‍
കനവുകള്‍ കൈയ്യെത്തി യാഥാര്‍ത്ഥ്യമാക്കുവാന്‍
കവിതകള്‍ മെട്ടിട്ട ഹൃദയം മയങ്ങിടാന്‍
ഇനിയു പിറക്കുന്ന പുലരിയില്‍ മൊട്ടിടും
പൂക്കളിന്‍ മാറിലുമാക്കാറ്റിന്‍റെ കൈയ്യിലും
മായികമണവുമായ് ഹൃദയം നിറക്കുവാന്‍.
ഇനിയെത്രനാളന്‍റ പ്രണയമേ വൈകിടും
ഈ ഇടവഴിപ്പാതയില്‍ എന്‍ കൈകളെ കോര്‍ത്തിടാന്‍...!
............അഭിലാഷ്..............
No comments:
Post a Comment